"Farewell sa huling" SONA

- Doy Cinco

Kung magkakatotoo ang hinala ng marami, isa sa mainit na papalakpakan ng mga palaka (partidong Lakas-Kampi) at alipores ni GMA sa State of the Nation Address (SONA) sa Lunes ay ang ngiting asong "ipangangalandakan nitong matutuloy ang 2010 election. Ibibida rin ang automated election na kapani-paniwala raw, credible at malinis."

Aasahang total denial at ipagmamayabang nito na "wala ng Con-As, walang emergency rule, walang martial law,  hindi totoo ang transition government,  haka-haka lamang ang NO-EL senaryo at higit sa lahat, anunsyong lilisanin niya ang kanyang poder sa Hunyo, 2010, ayon sa itinatadhana ng batas."

Lakas loob din na ipapahayag ni GMA na magiging matatag, kaalyado at kabalahibo nito ang mananaig sa 2010 presidentiable election. Sa katunayan, ipinoporma na ng PALAKA si Vice President Noli de Castro, ang pinakamalapit at kaututang dila ng pamilyang Arroyo at isa sa mga llamado sa mga lumalabas sa survey. Aasahang papakalmahin ang buong barkada’t organisasyon na magpapatuloy ang programang sinimulan nito may siyam na taon na ang nakalipas, walang mababago, status quo kung baga, walang patakarang maaring maisagawa laban sa pamilyang Arroyo at tuloy ang maliligayang araw ng Malakanyang at mga alipores nito sa Kongreso.

Karugtong na ipagwawagwagan ni GMA ang panawagang “all out war” o pagwawasiwas ng kamay na bakal sa mga kaaway ng estado. Tulad ng mga naunang SONA, paulit-ulit na mangangakong dudurugin nito ang terorismo, ang Abu Sayyaf Group, Jemaah Islamiya, CPP-NPA, ang drug lord-narco politics, mga kaaway ng estado’t gubyerno.

At dahil naka-adres kay Uncle Sam, kay President Obama, sa mga mamumuhunan at sa mga dayuhan ang SONA ni GMA, sisiguruhin nitong mapoproteksyunan, mapapalakas at maisusustina ang katatagan at istableng pampulitikang kalagayan ng bansa. Sisiguraduhin nitong magpapatuloy ang kanyang legacy na mapabilang ang Pilipinas sa "second world at  strong republic" at sisimulan ang mga naudlot na reporma sa pulitika at eleksyon. Ibibidang tatalunin nito ang mga kaaway sa pulitika bago ang 2010 presidential election.

Kasunod na ipagmamayabang ni GMA ang mga achievement sa inprastruktura at ekonomiya na para sa kanya, hindi raw umapekto sa Pilipinas ang resesyong tumama sa mundo bagkus tumaas pa raw ang gross national product (GNP growth rate) ng bansa. Malamang sabihin din nito na naging matatag ang demokrasya sa ilalim ng kanyang panunungkulan, tumalima at rumespeto sa karapatang pangtao at pagsawata ng katiwalian sa gubyerno.

Kaya lang, para sa marami, ano man ang matatamis na laman ng kanyang SONA, tulad ng mga naunang mga (8x) SONA, pawang mga retorika, propaganda at pagmamayabang, walang dudang lameduck na at tiyakang wala ng maniniwala sa administrasyong Arroyo.