Somalia, Failed State, nuclear waste at piracy

Doy Cinco / April 14, 2009

May ilang libo ng mga kababayan nating mga seaman ang malamang nabiktima na ng pamimirata o krimen pandagat sa Gulf of Aden malapit sa baybayin ng Somalia. (Larawan: Toxic waste behind Somali piracyaxisoflogic.com)

Tulad ng Pilipinas, ang Somalia ay dumaranas ng matinding karalitaan, matinding gutom, digmaan at malalang kriminalidad. Simula pa noong 1991, matapos pabagsakin ng mga warlords o mga siga-sigang malalaking politikong angkan ang diktador na si Mohamed Siad Barre, wala ng tumatayo’t gumaganang gubyerno sa Somalia. Kaya lang, kung ang Pilipinas ay nasa weak state, ang Somalia ay nasa kategorya na ng failed state, kung baga nakaungos lang ng ilang taon ang Somalia sa Pilipinas.

May dalawang taon na ang nakalipas, sa gitna ng matinding kahirapan, may kulang-kulang na sampung libong (10,000) sibilyan ang namatay sa gera ng magka-alyadong pwersang Somali at Ethiopian at mga rebeldeng Islamista. Dahil sa civil war, may mahigit isang milyon ang nabulabog na mamamayan at nagsilikas.

Dahil sa paglala ng sitwasyong panseguridad, ultimo ang mga tulong at ayudang pagkain mula sa United Nation ay hirap makarating at nababalahuba. Ayon sa think tank na International Crisis Group (ICG), nasaksihan na raw ng mundo ngayon ang “gradual takeover sa isang estado ng mga kriminal gang" sa Somalia.

Kaya lang, ayon sa ilang sources, sabihin man nating walang gubyernong umaandar sa Somalia, maaaring may katwiran ang mga mamamayan (Somali) nito kung bakit kinakalaboso o ini-infound nito ang mga barkong iligal na naglalaglag ng toxic materials sa kanilang baybayin. Ayon sa UN envoy na nakatalaga sa Somalia at kinumpirma ng Al Jazeera, ginagawang PAYATAS dumping site o tapunan ng basura at nuclear waste ng mga malalaking kumpanya mula sa mayayamang bansa sa Europa at Asia ang baybayin ng Somalia.

Kung baga, “gutom at mahirap ka na nga, unti-unti ka pang nilalason at niyuyurakan.” Kaya ganun na lang katindi ang reaksyon ng mga grupong Somali sa "pamimiratang" isinasagawa at magdemand ng ransom bilang pantubos sa damyos na inilikha sa baybayin dagat ng mauunlad na bansa sa Somalia. Sa kanila, ang kabayaran ay kung tutusin ay barya lamang o balewala lamang kung ikukumpara sa mahigit dalawang dekadang tuloy-tuloy na pagkalason ng kanilang karagatan o environmetal destruction na tinamasa ng mamamayang Somalia sa kamay ng walang puso, ganid, dorobong mga malalaking kumpanya ng mundo.

Sinamantala ng mga malalaking kumpanyang ito ang pagiging failed state ng Somalia, ang kawalan ng gubyernong umiiral resulta ng dalawang dekadang digmaang sibil na kung tutuusin ay sanhi rin ng panggagatong ng mayayamang bansa sa Europa at Amerika. Sa pamamagitan ng mga sindikatong MAFIA, nagawang mai-facilitate nito sa mga warlords ng Somalia ang deal sa pagtatapon ng toxic at nuclear waste ng malalaking kumpanya ng mundo. (Larawan: ...dumping waste in Somali waters.dittologica.net)

Nakamenos ng gastusin sa waste disposal system ang malaking kumpanya. Sa mahigit $1,000.00 kada toneladang toxic waste disposal material, mga $2.50 / tonelada na lamang ang naging bayarin ng mga kumpanya kung ito'y itatapon na lamng sa baybayin dagat ng Somalia.

Ang malungkot, inililihim at kasabwat pa ang ilang malalaki at kilalang broadcast at print media ng mundo (CNN, BBC at iba pa) sa katotohanan at pinalalabas na isang anyo ng pamimirata ang hakbanging ginagawa ng ilang grupong armadong Somali sa karagataan ng Aden.

Hilong talilong ang mga lokal na awtoridad kung paano mareresola ang krisis ng piracy lalo na’t wala itong kakayahan na suportahan at protektahan ang mga Pilipinong marino. Hindi rin naman uubra kung magpapatutupad ng “deployment ban ng mga seaman na dadaan sa pirate-prone areas o magpanukalang ibagbawal na ang pagbagtas sa baybayin ng mga Plipino seaman. Sabi nga ni Chip ng Hongkong, isa lamang tayong ALILA ng mundo.” At kung ika’y alila, walang magagawa ang isang alilang bansa na protektahan ang kanyang mga anak na namamasukang katulong ng mundo.”

May mahigit $2.2. bilyon ang ipinadala ng Pilipinong marino noong 2007 at ayon sa Pangulong Arroyo, ang marino raw ang pinakalaking sektor ng kabuuang OFW ang siyang may pinakamalaking nag-aambag ng ekonomiya ng Pilipinas.

Kahalintulad sa kautusang ipinagbawal ang deployment sa Iraq, Nigeria at Lebanon kung saan ni isa mang PIlipno ang hindi tumupad sa nasabing panawagan. Sapagkat isang major arteries sa mundo ang karagatang sa pagitan ng Yemen at Somalia kung saan mahigit 20,000 mga barko ang dumadaan kada taon. Ang hindi alam ng DFA, mahigit 30% ng mga marino sa mundo o 350,000 (1 : 3, isa sa tatlong marino ng mundo) ay mga Pilipino. Kung sinasabing “super maid tayo ng mundo, ganun din sa pagiging marino, tayo na ngayon ang marino’t pahinante ng mga barko ng mundo.”

Nasaan ang mga bayani sa kalikasan ng mundo, ang GREENPEACE at WWF?