Political survival ni GMA, NOAH’s ARK at emergency power

Hindi nating alam kung makakayanan pang maisalba ni Ate Glo ang sarili mula ngayon hanggang 2009. Sa mahigit pitong (7) taong walang sawang pagtatakip, walang inatupag kundi ang dumepensa’t mag-total denial sa talamak na katiwalian, kurakutan, kasinungalingan, dayaan, suhulan at kabulukan, sa gabundok na tumamang tsunami, lindol at bagyong pulitikal (bad governance) sa bansa.
Ang ilan sa nakikitang solusyon ng kanyang mga tongsultant, ang pinag-aaralan, natitira at nilulutong option ng Malakanyang; ang "NOAH's ARK (bangkang papel) at EMERGENCY POWER." (Political cartoon; si GMA at ang Bangkang Papel, www.filipino.net)

Sa proposal na isinumite at dinisenyo ni Gov Salceda na pinamagatang “Strategic Response to Food and Fuel Crisis-Noah’s Ark Framework.” Kung ikukumara sa P18.0 bilyon subsidyo para sa elektrisidad at paaralan, massive cash subsidy na nagkakahalaga ng P144.0 bilyon ang kakailanganin ng gubyernong Arroyo. Sa kabuuan, isang multi-year policy mix na nagkakahalaga ng P316.0 bilyon karagdagang pampublikong panggastos mula ngayon hanggang 2010 o tatlong taong programa ang Noah's Ark. Katumbas ito ng isang porsiento (1%) ng GDP na isusustini hanggang tatlong taon.

Sa kabilang banda, ang emergency power na nauna ng pagulungin sa bisa ng Executive Power 728, ay isang provision na nakapatungkol sa kung paano kahaharapin ni Ate Glo ang lumalalang krisis sa pagkain at langis. Mukhang ito ang kasagutan at solusyon sa isyung “lame duck" president na ibinabato ng kanyang mga kritiko.

Sa nasabing batas, kung aabot sa katindihan o paglubha ng kalagayan ang bansa, pahihintulutan si Ate Glo na i-explore ang emergency power. Sa ilalim ng EO 728, itatayo at bibigyang kapangyarihan si Ate Glo at Kongreso sa pamamagitan ng isang konseho, ang National Food and Emergency Council (NFEC) na makapagbalangkas at makagawa ng mga rekomendasyon patungkol sa lumalalang krisis ng ekonomiya.

Kung sa bagay, maaring kabiliban, pagtawanan, sabihing namaster na nito o nakabisado na ng Malakanyang ang teknolohiya sa kung paano malusutan ang iba’t-ibang malulubha at patong-patong na krisis bansa. Maswerte rin si Ate Glo, tulad ng kanyang gubyernong gigiray-giray, mahina, sectarian, watak-watak at walang mukha ring maiharap na alternatibo ang oposisyon at mga kaaway sa pulitika. Oo nga’t kamuntikanan ng masipa ito sa poder, nagawan pa rin nitong makabawi’t makaligtas ng mahigit tatlong beses sa tangkang pagpapatalsik sa poder.

Kaya lang, kahit sabihing walang nagawa’t walang nangyari sa inaasam-asam nitong “LEGACY,” sa kabila ng kaliwa't kanang pagwasak ng mga demokratikong institusyon ng bansa, ipangalandakang buluk ang COMELEC, magastos ang electoral campaign, trapo ang nananaig na kalakaran sa mga political party sa Pilipinas. Sa kabuuan, inaamag na ang pulitika’t electoral system sa bansa, ang sigurado, walang dudang matutuloy ang 2010 presidential election.

Doy Cinco
June 10, 2008

Related Stories:
Perfect storm, a brewing
http://www.tribune.net.ph/commentary/20080610com1.html