Huwag na kayong BUMALIK! (Europe Junket TRIP)

Sa kabila ng sinasabing priority bill at panawagang "MURAng gamot PARA SA MAMAMAYAN o “Cheaper medicine bill”, kung saan ang mayaman at mahirap sana ay parehong makikinabang, nagawa pang magpasarap ang mga kawatan /kinatawan sa Kongreso. Sa kabila ng libu-libong mamamayang Pilipino ang namamatay araw-araw ng wala sa panahon, dahil sa sobrang kamahalan ng gamot, sa kabila ng kaliwa't kanang kontroversy, ang suhulan sa Malakanyang breakfast meeting at katiwalian, nagagawa pang magliamerda sa Europe, (Spain, England at France) ang ating mga “hinalal” sa Kongreso. (Editorial Cartoon:http://www.abante.com.ph/issue/dec0507/main.htm)

Ito ang mga hindi mabilang na halimbawa, ang "nagpapatototoong" “pagsisilbe nga sa bayan ang pakay sa pulitika ng mga pulitiko.” Ito ang karaniwang bukang bibig ng mga nagnais tumakbo, hanggang sa nailukluk at naipwesto sa Kongreso. Ang tanong, may tangang Pinoy pa bang naniniwala pa sa mga pulitiko? Kung baga, sa persepsyon ng mamamayan, walang bago, hindi na balita at parang namanhid na ang tao sa araw-araw na ginawa ng diyos na laman ng pahayagan, sa TV, sa radyo, internet at sa BLOGs ang suhulan, pangungurakot,ang pagsisinungaling, katiwalian at JUNKET ng Malakanyang at Kongreso.

May mahigit dalawang daan (200) na pawang mga kaututang-dila ni Ate Glo ang mga naisama sa trip, ang partidong Kampi at Lakas. Maliban sa mga Cabinet officials (executive department), kasama rin ang ilang malalaking negosyante, tatlong senador, mahigit 35 Kongresman, ang kani-kanilang mga asawa't pamilya, boyfriend at girlfriend (listahan sa baba). Halos mapuno ng buong barkada't delegasyon ang PAL charter flight (250 total passenger capacity) na papasada sa Spain, France at United Kingdom. Ayon sa apologetic na si Sec Ignacio Bunye, “KKB o kanya-kanyang bayad naman daw ito.” (Larawan sa itaas: http://www.abs-cbnnews.com/topofthehour.aspx?StoryId=101341)

KKB man ito o bahagi ng pork barrel, ang Europe trip ay isang executive affairs at hindi in-AID of legislation. Kahit ano pang palusot ni Sec Bunye, ang sigurado, "may $9,000 ang magagastos ng bawat isang pulitiko sa biyahe (P400,000.00). Hindi pa kasali rito ang $1,000 hotel accomodation at food allowances at $3,000 pocket money bawat isa sa kanila. Ang dokumentadong baon ng bawat isa, $13,000. Ayon sa mga pahayagan, may P50.0 milyon ang kabuuang magagastos ng Malakanyang sa buong biyahe sa Europa.

Siguradong hindi pa kasama rito (undocumented) ang iba pang gastos sa gimikan, pagsho-shoping, pamamasyal sa red light district o side trip na kanilang papasadahan sa loob ng isang Linggong pamamalagi sa Europa. Kaya't pinapaniwalaang hihigit sa $25,000 o P1.0 milyon ang tantyang magagastos ng bawat isa kanila. Ang suma total, aabot ng P100-200.0 milyon ang mawawala na naman sa kabang yaman ng bansa. Ayon sa ilang inpormante, Chicken para sa Malakanyang ito kung ikukumpara sa "P5.0 bilyong warchest na gagastusin (Cha-Cha), masawata lamang ang tangkang KUDETA ng mga kaaway sa pulitika."

Pero ayon sa isang kasamahan nila sa Kongreso, si Cong Joson ng Neuva Ecija, “dahil isa itong un-official trip, maaaring blowout o PABUYA ito ni Ate Glo sa matagumpay na pagkakalibing, pagkatay ng huling isinalang impeachment sa Kongreso may ilang linggo na ang nakalipas." Maaari rin namang bumakas ang ilang PADRINO o may nag-isponsor na mga Multi-National DRUG companies na siyang target sana ng panukalang batas na cheaper medicine bill, "kapalit ng pagbinbin, pagpapalambot hanggang sa pagbabasura ng panukalang batas.”

Ito ba'y isang pamamaraan ng pagba-bonding sa pagitan ng Malakanyang at Kongreso, blow-out ba ito o bayad utang? Ayon sa marami, "ito na ang pinakamalaking delegasyon at pinakamagastos na junket trip sa kasaysayan ng Kongreso at Presidential entourage trip na pinangunahan ng Malakanyang sa bansa."

Habang nagpapasarap ang mga pulitiko, libong Pinoy ang namamatay dahil sa sakit araw-araw at kakulangan ng hospitalization , milyong Pilipino ang naninirahan sa 'di maayos na kalagayan, walang maayos at mapanganib na paninirahan, kawalan ng serbisyo't pangkagalingang bayan tulad ng; maiinum na tubig, kawalang kuryente, kakulangan ng transportasyon, 'di kalidad at walang edukasyon. Habang may naka-ambang pagbitay sa isang kababayan sa Kuwait, may milyong Pinoy at padre de pamilya ang naitulak maging super katulong at ipinasubo sa Middle East, sa Africa, Asia at sa Europa para lamang sa DOLYAR at maipangsalba sa ekonomiya.

Ang malungkot dito, mukhang sila na lamang ang hindi nakaka-alam na sila (Kongreso) ang pinakabuluk, pinaka-heavily criticized political institution sa bansa. Sa kabila nito, sila pa rin ang bida, sikat, sila pa rin ang pinapupurian, ipinagmamalaki, itinuturing “political machinery, pag-asa ng bayan at katuwang” ng Malakanyang sa kapangyarihan. Sila ang bumubuo ng halos karamihan (150) sa Kongreso na nasa ilalim ng Partidong Lakas-CMD, KAMPI at ilang maliliit na partidong masugit na kaalyado ng Malakanyang. Sila ang larawan ng pulitiko, sila ang tumatabo buwan-buwan sa anyo ng pork barrel, cash gift, pakimkim, token at good-will mula sa Malakanyang, sa mga Chineses TAIPANs, sa mga Multi-National Companies (MNCs), mula sa gambling Lord at Drug Lord.

Sila ang mga pekeng kinatawang nailukluk dahil sa padri-padrino, DAGDAG/BAWAS special operation, dahil sa Kasal, Binyag, Libing (KBL) at Guns, Gold at Goons. Sila ang mga political clan, dinastiya o mga OLIGARKIYANG may ilang dekada't henerasyong may hawak ang kapangyarihan at kabang yaman ng Pilipinas.

Ayon kay Cong Boyet Gonzales ng Mandaluyong (Lakas) sa isang “orientation seminar" sa mga baguhang Kongresman (14th Congress) kamakailan lamang, "ito ang klase ng trabaho natin, ang mga perks at benepisyo, mga junket sa trip abroad, paggastos ng pork barrel” at ito ang, "ang pinakamagandang hanapbuhay sa balat ng lupa (the best job in the world)."

HUWAG NA KAYONG BUMALIK!
Kasama sa Europe Junket Trip;
1. Ang buong pamilya ng Macapagal Arroyo (Mike Arroyo, mga anak at asa-asawa nila't mga apo (business class).
2. 3 Senador; si Sen Miriam Santiago (larawan) , Angara at Zubiri
3. Mga Cabinet officials; Finance Sec Peter Favila, DA Sec Arthur Yap, Press Sec Igncio Bunye at iba pa (Business Class)
4. Mga isang daang (100) mga Negosyante (Philippine Chamber of Commerce)
5. Ilang Gobernador (ULAP officials)
6. 35 District Rep, mga pamilya't kani-kanilang boyfriend at girlfriend; Pangungunahan ni Deputy Speaker Amelita “Girlie” Villarosa ng Occ Mindoro (larawan sa ibaba at astig nung exposay ng pamumudmud ng P500,000.00 sa Malakanyang) ang buong delegasyon sa Kamara; Ang mga kasama sa LAKWATSAHAN ay ang mga sumusunod;

Representatives Victoria Reyes of Batangas, Rodolfo Antonino ng Nueva Ecija, Nanette Castelo Daza ng (4rt) Quezon City, Zenaida Angping ng Manila, Representatives Reylina Nicolas ng Bulacan, Ma. Milagros Magsaysay ng Zambales, Mary Ann Susano ng (2nd) Quezon City, Rizalina Seachon ng Masbate, Herminia Ramiro ng Misamis Occidental, Trinidad Apostol ng Leyte, Rachel Arenas ng Pangasinan, Antonio Cerilles ng Zamboanga del Sur, Reynaldo Uy ng Samar, Roger Mercado ng Southern Leyte, Albert Garcia ng Bataan, Monico Puentevella ng Bacolod City, Abraham Mitra ng Palawan, Arnulfo Go and Datu Pax Mangudadatu ng Sultan Kudarat, Monica Prieto Teodoro ng Tarlac, Anna York Bondoc at Aurelio Gonzales ng Pampanga, Ferdinand Martin Romualdez ng Leyte, Danilo Suarez ng Quezon province, Mark Mendoza ng Batangas, Del de Guzman ng Marikina, Carmen Cari ng Leyte, Sharee Ann Tan ng Western Samar, Maria Isabelle Climaco of Zamboanga City and Carissa Coscolluela ng party-list group na Buhay.

Kung iniisip ng Malakanyang na malaki ang puhunang ipapasok (bilyong Piso) ng mga tusong negosyanteng mga European countries sa bansa, simple lang ang hinala't responde ng mamamayan diyan, "tulad din 'yan ng mga mamumuhunang ZTE-Broadband, Cyber ED kickback na sila-sila lang ang makikinabang."
"Mag-TNT at Huwag na kayong bumalik, pabigat lang kayo sa bayan!"

Related Story: "Senators hit European junket of congressmen:" http://www.philstar.com/index.php?Headlines&p=49&type=2&sec=24&aid=20071204132

Doy Cinco / IPD
December 3, 2007