Recall petition sa Pampanga, stakeholders ang lahat

Doy Cinco / September 4, 2008
Nakakalungkot isipin na kung sino pa ang "nagsusulong, nagtutulak at nananawagan ng good governance, moralidad at responsible citizenship, krusada laban sa jueteng at kurakot" ay siya pa ngayon ang iniipit, pinapatanggal sa pwesto at kinakasuhan ng katiwalian at kabuktutan.
(Photo: ang walang pinatunguhang "dialogo sa pagitan ng grupo ni Gov Among Ed at Vice Gov Yeng Guiao," noong July 21 sa Bren Guiao Convention Center sa San Fernando City,Pampanga; kuha ni Doy Cinco; http://doycinco.multiply.com/photos/album/13/Pampanga_DIALOGUE#)

Ano ang layunin at bakit gustong patalsikin sa pwesto bilang gubernador si Among Ed? Ang recall petition ba'y interest ng nakararaming Kapangpangan, para ba ito sa kaunlaran, good governance at para sa pagbabago? Dahil ba sa plataporma at prinsipyong ipinaglalabang political reform, pagwawaksi ng kabulukan ng pulitika, pagwaksi ng guns gold at goons at sistemang padri-padrino? Ano ang political agenda, ano ang ALTERNATIBA?

Ang isa pang tanong ay kung bakit tayo nakiki-alam at nababahala sa pampulitikang sitwasyon ng Pampanga, the same manner na bakit ganun na lamang ang pagmamalasakit natin sa Mindanao, partikular sa Maguindanao, ang lugar ng Ampatuan clan, MOA-AD at digmaang nagaganap sa pagitan ng militar at MILF. Hindi naman tayo Kapangpangan, tubong WARAY tayo, hindi tayo tagaMindanao-LUMAD at lalong hindi tayo muslim. Tulad ng kasabihan at awit ni Jess Santiago, "ang sakit ng kalingkingan ay dama ng buong katawan," lahat tayo ay stakeholders, lahat tayo ay aktibo't responsableng mamamayang Pilipino.

Politically motivated, jueteng at ang isyu ng (guarry) katiwalian ang nasa likod ng recall petition. Kahit saan tignan, isang libong beses na "hindi kapani-paniwala ang mga ibinibintang ng mga kaaway sa pulitika ni Among Ed na kesyo wala itong direksyong sa pamamalakad bilang gobernador ng Pampanga." Batid ng lahat na ang mga makapangyarihan at ang mga buwaya ang nasa likod ng recal petition; ang pangunahing jueteng lord ng bansa, si Mr and Mrs Bong-Lilia Pineda, ang kanyang ka-running mate na si Vice Gov Guiao, mga nakinabang sa maanomalyang quarry operation, Henson, ang campaign manager, ang mayayamang angkang ng Pampanga at si Mayor Pelayo ng Mayor's League ng Pampanga.
(Photo below: "ang mga SIGA-SIGA ng Pampanga: Cong Mikey Arroyo, Vice Gov Guiao, Mrs Henson, Lilia Pineda, Mayor Pelayo, GMA; Pasimuno ng kaguluhan sa Pampanga, bp0.blogger.com/.../s400/LolitaHizon1.jpg)
Tahasang pinangunggunahan na natin na isang "futile exercise, pagsasayang ng panahon at resources lamang ang recall petition ng grupong Kambilan, Bokal at mga mayor ng Pampanga."

Una; hindi maiiwasan paghinalaang may kinalaman si GMA sa recall petition. Naniniwala ang marami na siya lamang at wala ng iba ang maaring makapagpatigil sa katarantaduhang inaasal ng kanyang mga galamay sa Pampanga. Kung tutuusin, isang kumpas lamang ni GMA sa mag-asawang Pineda at kay Guiao, tapos na ang boxing sa Pampanga. Inaamin ni Among Ed at ibang mga nagmamasid na bilyong pisong budget ang gagamitin para maabot ang 100,000 pirma para sa recall petition at special election at tulad ng dati, gagamitin ito sa pananakot, malawakang pandaraya't panunuhol at vote buying.

Pangalawa; malabong magprosper ang recall petition sapagkat, may kasalukuyang umiiral na status quo order pa ang Korte Suprema. Ultimo ang astig na abugadong si Romulo Macalintal ang nagsasabing isang “political absurdity” ang naturang recall petition. Anya, “hindi ito magpoprosper sa dahilang may nakapending na election protest na nakafile sa Comelec ang talunang si Lilia Pineda."

Pangatlo; inaamin mismo ni Con Mikey Arroyo, ang padrino ng lalawigan na "malabong magtagumpay ang recall petition, sapagkat, “may malaking kakulangan sa historical precedent ang recall sa Pilipinas. Walang recall move ang nagtagumpay at kadalasa'y banderang kapos at hindi na umaabot sa Comelec." Kung ganun pala, bakit ayaw niyang patigilin ang kahibangan ng kanyang mga alipores sa probinsya. Ano ito, trial and error tactics, tinatakot lang ba, pinaparusahan lang, tinuturuan lang ba ng lesson si Among Ed?

Pang-apat; Walang pondo para sa special gubernatorial election ang Comelec. Ito'y ayon sa mga binitiwang pahayag ng election field officer ng rehiyon na si Teresita Ocampo. Ayon sa kanya, may labing walong (18) recall petition na nakapending ngayon sa Comelec sa buong bansa at halos lahat tinitignang insufficient at walang substansya. Sa P5.0 milyon natitirang budget na nakalaan para sa mga special election, kulang ito sa tantyang P100.00 milyong kakailanganing pondo para sa special election sa Pampanga. Kung sakali man brasuhin ang Kongreso para sa additional na pondo, tiyakang kakapusin sa time frame ang nasabing recall-election sa Pampanga.

Panghuli; bukud sa babaha uli ng pera at kikita ang ilan, hinding-hindi makapapayag ang mga Kapangpangan na muling ibalik sa pwesto ang mga may kasalanan sa taongbayan. Totoong may kahinaan organizationally si Among Ed at may ilang tao sa kanyang paligid ang parang anay na gumigiba ng kanyang programa de gubyerno sa Pampanga. Dagdag pa, dahil ayaw tantanan ng mga kaaway sa pulitika si Among Ed, kahit paano, apektado ang delivery of basic services at programang ipinatutupad sa lalawigan.

Sadyang nagbabago na ang political landscape ng Pampanga. Bagamat nananating dominante ang TRAPO sa kabuuan, may mga bagong umuusbong na kilusan (new social and emerging movements) kakaiba ang layunin na posibleng magcounter balance ng pulitika sa Pampanga. Sa tulong ng mga Macapagal-Arroyo, Pineda, Lapid, Guiao, Henson at Pelayo, unti-unting nagigising at patuloy na lumalakas ang THIRD FORCE, ang makabagong kilusan ng mamamayan, ang “bagong pulitika,” mga AKTIBISTANG hindi klarong Kaliwa at lalong hindi makabagong konserbatibo o maka-Kanang pwersang reaksyunaryo.

Kung dati-rati'y usaping agraryo at anakpawis ang pangunahing pwersa at maka-uri (class oriented) ang oryentasyon, ngayo'y tila ata multi-sectoral, nagka-cut across sa lahat ng uri, halos kinabibilangan ng mga propesyunal, mga kaanak ng OFW-Overseas Filipino Workers, maliliit na negosyante, mga kabataan, mga kooperatiba, kilusang pangkumunidad at maralita at mga taong simbahan. Kaya't interesting at challenging ang gerang pulitikal sa Pampanga.

Kung noon ay nahati lamang sa grupong Kaliwa at Kanan, komunismo't sosyalismo versus kapitalismo't pyudalismo. Kung dati rati'y kimi, demobilisado, walang paki-alam at de-activated ang hanay ng mamamayan lalo na ang panggitnang saray ng probinsya, sa ngayon, tila nagbabago at nagiging masigla ang partisipasyon ng mamamayan sa gawaing paggugubyerno at electoral engagement sa probinsya.

Kung magtatagumpay ang recall at matatalo si Among Ed sa special election, walang kaduda-dudang magluluksa ang mga Kapangpangan. Tiyak na lalong sisigla ang kilos protesta at magreresulta ito ng malalaking mobilisasyon ng mamamayan kahalintulad ng electoral campaign nuong nakaraang taon ang magaganap sa Pampanga.

Related Story:
NO TO RECALL! YES TO REFORMS!
http://doycinco.blogspot.com/2008/08/no-to-recall-yes-to-reforms.html

For polling in Pampanga and Isabela by Mahar Mangahas
http://opinion.inquirer.net/inquireropinion/columns/view/20080906-159006/For-polling-in-Pampanga-and-Isabela