7.3% economic growth, pinakamataas sa loob ng 31 years?

Sa kabila ng katiwalian, pangungurakot at sinasabing pumapangalawa tayo sa Asia, sa kabila ng kaliwa't kanang extra-judicial killings, destabilization moved at banta sa katatagan ng Malakanyang, sa kabila ng walang humpay na pampulitikang krisis, sa kabila ng isyu ng illegitimacy-dalawang taong political survival mode ni Ate Glo, ang dalawang beses na impeachment attempt, ang panunupil at pagsikil sa karapatan pantao, sa kabila ng ilang dekadang insureksyon at rebelyong kinakaharap ng bansa, ang CPP-NPA at Islamic seccessionist movements, sukat akalain mo ba naman umunlad pa rin ang ekonomya ng ating bansa!
(Photo sa itaas, ang kilabot na General Palparan/ si Gen Lim at Sen Trillanes sa Manila Pen insidence)

Sa kabila ng walang tigil na pagbebenta ng ari-arian ng gubyerno, ang talamak na smuggling (mula Subic hanggang Cebu) at tax evasion, ang kaliwa't kanang iskandalong kinasapitan ng Malakanyang tulad ng Hello Garci at mega pacific scam, ang overpriced na Diosdado Macapagal Boulevard, Joc-joc Bolante at misuse ng fertilizer funds, the ZTE-NBN scandal ("Buck off!") at “sec may 200 ka rito," ang pamumudmud sa mga Governors and Congressmen at higit sa lahat, ang sandamakmak na laki ng utang panlabas na binabayaran ng Pilipinas, at ngayo'y sasabihing umaasenso ang ekonomya ng bansa? (Photo: Luxury car smuggling in Subic / Abalos Resign,cecidasupastar.wordpress.com)

How much more, "kung sakaling naging maayos, matino ang pulitika, kung matatag ang ating mga institution, may good governance, may STRONG REPUBLIC at mapayapa't solido ang ating lipunan, baka hindi lamang 7.3%, baka tulad ng karanasan ng China, baka mag-double digit pa sa 12-15% ang inunlad ng ekonomya ng 'Pinas?"

Iba pang usapin kung ito'y "dinuduktor lamang ng NEDA, ng Malakanyang ang mga datos, pamantayan, categories o sukatang ginamit sa sinasabing economic growth." Ipagpalagay na nating totoo na nga ang 7.3%, saan nanggaling at may kalidad naman kaya ang pag-unlad na ito? Dulot ba ito ng industrialisasyon at paglago ng output ng ating manupaktura?

Tulad ng inaasahan, naatribute ang paglago ng ekonomya dahil sa laki ng DOLYAR na ipinasok ng ating mga kababayang OFW. Natural, dahil sa may perang hawak ang ating mga kababayan, may epekto ito sa oryentasyong konsumerismo at ang resulta, lumago ang ekonomya ng SERVICE sector. Maliban sa CALL CENTERS, ang talamak na mga dambuhalang MALL na parang kabuting nagsulputan hindi lamang sa kamaynilaan, maging sa buong kapuluan.

Ayon sa Neda, "nakatulong ng malaki ang 19.5% inilaki ng dolyar na ipinasok ng OFW, naging $16.5 B nuong nakaraang taon, 2007. Hindi hamak na 8.7% naman ang ini-angat ng Service sector. Malaki rin ang ini-unlad daw ng industria at agrikultura na dulot ng inilago ng pumasok na puhunan sa MINAHAN. Samantalang 5.1% ini-unlad sa agrikultura sa pamamagitan ng fishery at forestry. Kasamang umasenso ang FINANCIAL sector, partikular ang insurance industry at negosyo sa TURISMO."

Ang agam-agam ng marami, sa kabila ng krisis-resesyong dinadanas ng US, maisustina kaya ang pag-unlad na ito? Batay sa karanasan ng China at ibang karatig bansa sa Asia, mga 10 - 12% growth rate taon-taon o at least sa anim hanggang sampung taon (6-10 years consecutive) consistent na pag-unlad ang kailangan ng Pilipinas upang sabihin umunlad na nga at marandaman ni Mang Pandoy ang kasaganahan.

Na-immune na ata ang mga Investors (Intsik, Hapon at Kanluraning bansa) sa walang humpay na pamumulitika sa Pilipinas at 'di na nila iniinda, pinapansin ang anumang alingasngas politikal sa ating bansa? Sadyang nagbago't kumplikado na ba ang ating lipunang ginagalawan? Hindi tayo experto sa larang ng ekonomiya, pero sadya atang totoo ang sinasabi ng iba na may "firewall ang ekonomya at pulitika," meaning may sariling galaw, dinamismo ang usaping ekonomya na hiwalay sa ano mang itinatakbo ng pulitika. Parang sinasabing, masalaula man ang demokrasya o mga demokratikong institusyon ng isang bansa, tuloy-lang ang larga't galaw ng ekonomya?

Kaya lang, 'di maiiwasang magtanong ang ating mga kababayan na “kung totoong gumaganda nga ang ekonomya, bakit ayaw irecall ng Malakanyang ang E-VAT, ibaba ang presyo ng langis at bilihin, kuryente’t tubig, hanapan ng trabaho ang mahigit apat na libong (4,000) “super KATULONG- caregivers, OFW na lumalayas araw-araw sa bansa. Kung totoong gumaganda ang ekonomiya, gawin abot-kaya, de-kalidad ang edukasyon, pabahay at kalidad ng pamumuhay (quality of life) sa kabuuan at hindi na tatanggapin, tatanggihan na ng mga 'Pinoy ang panunuhol ng mga pulitiko (vote buying-utang na loob) sa tuwing may halalan.”

Batay sa Economic and Social Commission for Asia and the Pacific (ESCAP), isang Bangkok-based UN agency, "ang pagbulwak, paglaki ng karalitaan at unemployment rate sa kabila ng sinasabing pag-unlad ng ekonomiya ay isang gabundok na suliraning kakaharapin ng Pilipinas."

Mismo ang United Nation Development Program (UNDP) ay nagbabala na 'wag na wag kaagad maniniguro, maniniwalang gumaganda ang ekonomiya ng ating bansa dahil lamang sa 'gumagandang mga economic indicators. Ayon sa kanila, habang sinasabing may pag-angat ng 7.3% growth rate, ganuon din kabilis, ganun din ang paglago, ang pagdami ng mga nawawalan ng trabaho (unemployment rate) at bumibilis ang phasing ng mga nagugutom na Pilipino.

Doy Cinco / IPD
February 1, 2008