Multo ng "Kongreso ng Mamamayan," umarangkada na

Dahil sa pagsabog ng bulkang Mayon, tsunami at lindol na tumama sa Malakanyang bunsod ng sunud-sunod na exposay-testimonya sa Senado ni Jun Lozada, ang star witness sa mabaho at maanomalyang ZTE-National Broadband Network, tulad ng inaasahan, naglunsad na ng kontra-opensiba, blitzkrieg propaganda ang Malakanyang mailigtas lamang sa kangkungan si Ate Glo.

Sa isang one whole PAID Ad sa mga tabloids at ilang malalaking broad sheet ng grupong nagpakilalang “Kongresong Mamamayan” kanina, mukhang umarangkada na ang media't propaganda war, ang kontra-atake "laban sa mga nagsusulong ng katotohanan, laban sa panawagang "communal action at moral revolution ng simbahan." Kasabay ring kakastiguhin at idedemolition job ang kredibilidad, ang personalidad ng kawawang si Jun Lozada at institusyon ng Senado.

Ito na marahil ang katagang binitiwang “tratrabahuin na lang namin 'yan sa MEDIA,” (kasama ang sikat na broadcaster sa isang Network), ng dating Kalihim na si Mike Defensor kay Jun Lozada nuong kasagsagan ng Senate investigation kamakalawa. Meaning, kung hindi nabulilyaso ang planong cover-up at hindi umabot si Jun Lozada sa Senado, aayusin, dudukturin at rerepackage sana ito sa Media.
Unang nakilala ang Kongreso ng Mamamayan (KM) nung sinuportahan nito ang proklamasyon 1017, ang diklerasyon ng “state of emergency” na nagbigay buhay sa naghihingalong estado ni Ate Glo noong 2006. Nung matapos ang May 2007 midterm election, humupa ang survival tendency at nag LEGACY MODE si Ate Glo, bigla itong naglaho sa eksena. Nung biglang sumambulat ang isyu ng Broadband controvercy at muling tumagilid ang lagay ni Ate Glo, biglang lumitaw ule ang multong KM. (Photo: 2006 State of Emergency; newsimg.bbc.co.uk/media/images/41374000/jpg/_.)

Sa manipestong inilabas ng Kongreso ng Mamamayan sa media, parang sinasabing isang demonyo, taksil at hindi bayani, isang luko-luko, dorobo't magnanakaw, pakana't bayaran ng mga pulitiko si Jun Lozada. Sa kabilang banda, pinalalabas na isang huwaran, nasa tamang direksyon, walang kurakot at katiwalian, diyos at anghel ang gubyernong Arroyo at ang tanging hangarin lamang ni Lozada ay iterrorized, i-destabilized at pabagsakin ang lehitimong pamahalaang daw ni Ate Glo Arroyo.

Bukud sa hindi ito nagpapakilala ng lubus, walang websight o adres man lang kung sakaling may tanggapan, sino-sino ang pamunuan at mga signatories ng kanyang manipesto at ilan ang kanilang kasapian, napakahirap paniwalaang tunay na organisasyon at nirerepresenta ito ng mamamayan. Sa pangalan pa lang, nakaka-intriga na, sapagkat ang unang kikintal sa isip mo'y parang grupong Kaliwa ang sinisimbolo, parang kilusang mapagpalaya ang pustura, makatao, patriotiko o isang koalisyon ang Kongreso ng Mamamayan (KM). Walang dudang taga Malakanyang ang nasa likod ng multong organisasyong kung tawagin ay Kongreso ng Mamamayan.

Ang ganitong istratehiya ay maihahalintulad lamang sa panahon ni Marcos, ang “Bagong Lipunan” sa panahon ng Martial Law, ang Sigaw ng Bayan ng ULAP (Union of Local Authorities of the Philippines) na naging behikulo upang maifacilitate ang pagpapapirma sa Pipol inisyatib (PI) sa naunsyaming isinusulong na Charter-Change noong 2005. Sa kaso ng Kongreso ng Mamamayan, ito'y maliwanag na pakana ng Malakanyang na ang tanging layunin ay aswangin ang mga kaaway ng palasyo, isalba sa rurok ng kahihiyan at pagbagsak ni Ate Glo sa poder.

Sa mga darating na araw, aasahang mas lalaganap at dadami pa ang ganitong klaseng propa at bilyong pisong payola sa hanay ng broadcast at print media. Kasabay na lalaganap ang operation dikit-poster, mga naglalambiting tarpuline sa lansangan na maglalaman ng mensaheng “let's move on na't” may kombinasyong banat sa Senado, sa CBCP, sa kilusang demokratiko, sa mga grupong nagtataguyod ng katotohanan at pagbabago.

Doy / IPD
February 13, 2008