DATO Macapagal Arroyo, larawan ng kabulukan ng sistemang Pulitika

Si Diosdado 'Dato' Macapagal Arroyo na mas kilalang Dato ang sikat, pinupulutan at usap-usapan ngayon hindi lamang sa Bicol maging sa buong bansa. Si Dato na napabilitang tatakbo sa 1st District ng Camarines Sur na “walang kalaban” ang siya ngayon kongretong ehemplo ng kabulukan, elitist-personality oriented at TRAPO (traditional Politicians) politics sa bansa.

Sa isang mapanuri at ordinaryong taga-bicol, paano maipapaliwanag ni Dato at ni Ate Glo na kanyang ina, na siya'y kumakatawan sa isang lugar may apat na raan kilometro (400 km) ang layo mula sa kanyang lugar na sinilangan at tinirikan? Paano mairerepresenta ang tunay na damdamin, kalagayan, adhikain ng mga Bicolano kung ika'y hindi naman talaga tubong Bicolano o ika'y isang peke at nagpupumilit na taga-Bicol. Batid ng mundo na si Dato'y isang Kapangpangan, Visaya, taga-QC at anak ng pinakamkapangyarihang pulitiko ng bansa. Kung sa bagay, kung "tanggap, welcome" si Dato, ampunin siya ng mga taga-Bicol bilang adopted son ay hindi malayong mangyari na magkaganito ang sitwasyon.

“Aksidenteng” napadpad si Dato Arroyo sa Bicol dahil sa pagiging ISKUL BUKUL, mahina sa klase at nakapangasawa ng Bicolana. Hindi nito pinagkakaila na hindi ito pumasa, hindi nito naabot ang rekisitong academic standard ng Ateneo de Manila sa QC, at bigyan siya ng chance na mag-enroll, magtransfer sa ibang Ateneo School, sa Ateneo de Naga sa Lunsod ng Naga, Camarines Sur. Maaring isang planado, pinag-aralan at pinag-isipan ng pamilyang Arroyo ang proyekto para kay Dato. Dahil kung planado ito, maaring tatlong lugar lamang ang landingan ng political career path ni Dato; Quezon City, Pampanga o sa Negros Occidental.

Una, walang dudang lumaki sa La Vista Village, Barangay Pansol, malapit sa UP at Ateneo de Manila, QC si Dato Arroyo, ang official na addrress ni Ate Glo. Ang Barangay Pansol ay pumapailalim sa 3rd District ng QC na hawak ng Defensor Clan. Hindi papayag ang mga Defensor na panghimasukan sila ng mga Arroyo sapagkat teritoryo ito ng mahigit ilang dekada ang 3rd District.

Pangalawa, kung sa Pampanga, hindi rin pupwede sapagkat hindi pa natatapos ang termino ng kanyang nakababatang kapatid na si (2nd term) Mikee sa 2nd District. Maliban na lamang kung magdadagdag ng isang distrito sa probinsya alang-alang lamang kay Dato. Dahil sa aapat lamang ang distrito sa Pampanga, napakasikip para sa mga angkan, sa mga anak na makapwesto sa probinsya.

Pangatlo, lalong hindi rin uubra kung makikisingit pa si Dato sa Negros Occ sapagkat kailangan munang tapusin ng kanyang Tyuhing si Cong Iggi ang termino nito at tulad ng Pampanga, masikip din sa pwestuhan ng malalaking angkan sa probinsya.

Tulad ni Mikee at Iggi, libreng makatutungton sa Kongreso ng walang pag-aalinglangan, walang kaduda-duda at walang kahirap-hirap si Dato. Ilan buwan na lamang, sa pagpasok ng unang sesyon ng 14th Congress. tatawagin na siyang "honorable at gentleman from Camarines Sur." Siya, kanyang kapatid, kanyang Uncle at ang partidong KAMPI at Lakas-NUCD ang sasawata sa pinaplanong ikatlong pagsasalang ng impeachment laban kay Ate Glo sa Kongreso.

Produkto ng PADRINO, political machinery, political clan, political negotiation, pambayad utang na iniluwal ng kabulukan ng pulitika at election sa bansa si Dato Arroyo. Ang nabakanteng distrito ang lumalabas na kabayaran at regalo ng Andaya Clan kay Ate glo kapalit ng pwestong pinanghahawakan nito ngayon sa Malakanyang bilang Kalihim ng Department of Budget and Management (DBM) at dating chair ng Appropriation Committee sa Kongreso.

Maliban sa kawalan ng track record, kanino siya accountable at sino ang kanyang pagsisilbihan? Hindi siyempre sa mamamayan ng District 2, bagkus sa mga Andaya, Villafuerte Clan at sa kanyang magulang nag-iisquat sa Malakanyang.

Isang yagit, matapang at malakas ang loob na pulitiko si Mayor Sabas Mabulo ng San Fernando, ang napabalitang tatapat sa higanteng pulitikong si Dato. College gradute ng Ateneo de Naga University si Mabulo. Kahit isang pulitiko, hindi ito naging balakid kay Mabulos upang maging aktibo ito sa Church-based Caceres Social Action Center. Bagong nag-involve sa local politics si Mabulos, kabilang siya sa isang NGO na nag-aadvocate ng kagalingan ng mga taga-Bicol. Dahil sa kahusayan, performance at tunay na paglilingkod ng walang pag-iimbot, natapos nito ang tatlong termino (9 years) bilang Mayor at dalawang taon bilang councilor ng San Fernando, Camarines Sur.

Pinutol ni Mabulo ang tulay na nag-uugnay sa kanila bilang alyado ng mga malalaking kahariang pulitikal sa probinsya, tulad ng Andaya Clan, siyam (9) na incumbent mayor at Villafuerte clan, mga kinikilalang dominant political clan sa Bicol. Ang pinagsamang makinarya ng Villafuerte at Andaya political clan, dagdagan pa ng Arroyo clan (Dato), masyado ng over kill at lubhang higante kung ikukumpara sa kuto at abang si Mabulo.

Walang malinaw na permamenteng partidong dinala si Mayor Mabulo. Ang bukud tanging alyado nito sa pulitika ay yaong mga taong nag-aadvocate at naniniwala ng prinsipyong “Transparency for good governance.”

Isang liblib na lugar ang bayan ng San Fernando na may mahigit 30 kilometro ang layo mula sa National highway kung saan matatagpuan ang bayan ng Libmanan, ang address na tinukoy, natagpuan at kunwaring umampon daw kay Dato. May sakop na 22 barangay at may kabuuang 14,200 botante na halos kasingdami ng isang barangay sa Metro Manila. Samantalang ang Bayan ng Libmanan na may 75 na bilang ng barangay, 41,000 botante, pinakamalaki sa District 2.

Kung experiences, track record ang pag-uusapan, panalo si Mabulo. Kung sa pababaan ng gastos sa electoral campaign (P50,000/election), panalo si Mabulo, kung sa plataporma, paglilingkod, dedication at prinsipyo, walang dudang panalo si Mabulo, kung parehas lamang, walang dayaan at demokratiko ang election, panalo si Mabulo. Kung dadaanin sa personality, LOHISTIKA'T MAKINARYA at TRAPO politics, walang dudang TALO si Mabulo.

Doy Cinco / IPD
March 21, 2007