Monday, February 27, 2006

Nami-miesta ang mga GESTAPO (CIDG,Querol at Lumibao)

Eh ano ngayon kung ideklara ni Ate Glo ang “State of national emergency,” 1017 o ang impaktong de facto Martial Law (ML)? Nagulat ba tayo? Nagtaka ba kayo? Nasorpresa ba tayo? Ang totoo, nakaraang taon (October'05) pang inaantabayanan ng lahat ang “emergency power.” Inaasahan ding idedeklara ang ML at pagsuspindi ng Writ of Hebeas Corfus, tulad ng diktadurang Marcos may tatlong dekada na ang lumipas. Hindi na bago ito at sa totoo lang, lumang tugtugin, at kung hindi tayo namamali mas lalo lamang ibinabaon niya sa kasaysayan ang sarili at ang kanyang poder. Sa kabilang banda pinalalakas ang adrenalin, ang enerhiya, naa-agitate, parang bitaminang nagpapalakas at binigyan n'yo pa ng buhay/abono ang sana'y nalalanta ng kilusang aktibista.

Ito naman ang “gustong gusto” ng kilusang masa, bukud sa naisu-sustina nila ang kanilang pagkilos, maraming napapasulpot na lider, bumibilis ang recruitment, nakokonsolida't tumatatag at nabibigyang linaw ang tunay na mukha't natatanggalan ng maskara ang gubyernong Macapagal Arroyo.

Gustong-gusto rin ng mga aktibista ang walang habas na paggamit ng pwersa ng riot squad (ay anti-riot pala) ni Querol at Lumibao! Sila ang berdugo ng Malakanyang at tunay na pasimuno ng kaguluhan sa lansangan. Sila ang mga asong ulol na ginagamit upang garapalang ipatupad ang isang illegal, brutal, pikit matang pagsunod sa anti- demokratiko at ala-MAFIAng batas ni Ate Glo. Ito ang kanal na pinagmumulan ng radikalisasyon ng kabataang estudyante. Ito ang abono at pandilig sa extremistang tunguhin ng mga kabataan. Hindi tayo magtataka kung muling mabuhay, mag-initiate, kung may bagong magtatag na kahalintulad ng Red Army, ETA, Red Brigade, Alex Buncayao Brigade (ABB), Hamas o suicide bomber o Irish Republican Army (IRA) ang mga kabataan. Mga Gestapo, gusto n'yo bang mangyari ule sa atin yan, Lumibao, Querol???

Kaya, sige, ituloy n'yo lang ang “warrantless arrest”, posasan at sinasapok habang nangangaladkad. Sana tinuluyan n'yo ng ibinalanggo si Randy David at iba pang kasamahan nito. Bakit walang mga sundalo sa mga lansangan na nanghuhuli, nakabalagbag at nangangatok ng mga bahay-bahay. Bakit wala pang singkwenta (50) ang dinampot n'yo nung Friday, 24 ng February? Bakit hindi isang daan (100)? May apat na araw ng namamayagpag ang de facto Martial Law at tila matumal ang damputan at arestuhan. Sinasabi n'yong 200 ang nakalistang huhulihin n'yo, bakit hindi dalawang libo (2,000)? Walang pang sampu ang inyong nahuhuli, tatanga-tanga, tamad ba mga Gestapo n'yo o nag-aalangan pa kayo sa gagawin n'yo?

Natatakot ba o nananantya pa ba ang Malakanyang? Bakit, confused ba kayo? Hinimay- himay n'yo ba yan, plinano, pinag-aralan o verbatim n'yong kinopya lamang yan sa 1081 ni Marcos. Noon, walang keme-keme, hayagan, libo agad ang ibinalagbag sa Aguinaldo, Bonifacio At Crame o ABC?

Dahil wala kayong paki-alam sa censorship, aba eh 'di ituloy n'yo lang ang take-over ('wag n'yong isasara, sayang) sa mass (broadcast at Print) media at bakit dadalawa pa lang ang (Abante at Daily Tribune) napupuruhan? I-take over n'yo na rin ang ABS-CBN, ABC 5, DZMM, DWWW, DWIZ, Malaya, Phil Daily Inquirer at iba pa. Arestuhin at ipakulong n'yo na rin ang mga Party List, mga retirado at mg active duty na mga matataas na opisyal sa militar. So what, eka nga?

Itodo n'yo na! Laklakin n'yo na! Sagarin n'yo pa, i-raid n'yo at ipasara n'yo ang maraming opisina sa civil society, mga institusyong kinabibilangan ng NGO (Non-Gov't Organization) at higit sa lahat 'wag na kayong magpatumpik-tumpik pa, ilabas n'yo na ang tunay na baraha n'yo, ang pagkatao n'yo, ipagbawal ng ganap ang kalayaang sa pamamahayag, sikilin ang pagsasalita, supilin ang kalayaan sa pagtitipun-tipon at pag-a-asembliya (ipagbawal ang rally at demo).

Kung sa tingin niyo'y may “rule of law” at prinoprotektahan n'yo ang civil liberties at karapatang pantao, ituloy n'yo na! Tutal nasimulan n'yo na, isustini't pangatawan n'yo na! “Wag n'yong intindihin si Sen Drilon, marami kayong “extra powers” upang ipatupad ang “warrantless arrest” at pagsususpindi ng “writ of hebeas corpus”. “Wag n'yong igalang ang mga korte at kung kokontra ang mga ito, ipasara n'yo ang Korte Suprema. Walang kakasa sa mga 'yan.

Huwag n'yong paniwalaan si Manong Tabako. Hindi “overkill” ang state of emergency”. Hindi ito makakapinsala sa ekonomya ng bansa kumpara sa totoong kudeta (na sa tingin ni Ate Glo) na isasagawa sana ng kanyang mga kalaban. Diumanong sinabi ni Tabako na, “walang dahilan para magdeklara ng national emergency dahil ang napigilang tangkang kudeta na siyang sinasabing basehan ni Pangulong Arroyo ay maituturing na conspiracy lamang.” “Pinayuhan din nito si Arroyo na tignan bilang leksyon ang insidente sa termino ni dating Pangulong Corazon Aquino kung saan hindi umano ito nagdeklara ng anumang emergency rule sa kabila ng serye ng mga coup attempts sa kanyang panunungkulan.” Dedma lang Ate Glo, nagpapasikat lang si Tabako.

“Wag kayong makinig sa mga buladas ni Sen Miriam Defensor Santiago, isuspindi n'yo ang functions ng Constitution, ang korte at Tongreso. “Wag n'yong pansinin si Sen Rodolfo Biazon, 'wag n'yong katakutang ang bantang bulkang sasabog, ang krisis pampulitikang malamang daw na mauwi sa civil war o insureksyon! Paabutin n'yo hanggang ruruk, ubusin n'yo ang lahi ng inyong kalaban at sana matulad kayo sa mapait na sinapit ng rehimeng Ceausescu ng Romania nuong 1988!!!


doy cinco/ipd
Feb 27,'06

2 comments:

Anonymous said...

[u][b][url=http://turbobits.net]Скачать программу Movienizer 3.2 Build 158 [/url][/b][/u] - Бесплатные фильмы скачать бесплатно можно можно у нас!

http://turbobits.net/2113-skachat-film-gruppa-riska-2010-dvdrip.html

Anonymous said...

Good day very cool blog!! Man .. Excellent .. Amazing .
. I will bookmark your site and take the feeds additionally?
I'm satisfied to search out a lot of useful info here in the publish, we'd like work out more strategies on this
regard, thanks for sharing. . . . . .

Here is my homepage - Easy Diets That Work
My site: Easy diets that work