Eh ano ngayun kung lumakas ang Piso at may economic recovery........

Hindi nangangahulugang utang natin kay Ate Glo (kredito) ang paglakas ng Piso kontra sa dolyar. Ang tingin ng lahat, ang paglakas ng PISO ay hindi idinulot ng panloob na kaganapan (external factor), ito'y dahil sa panlabas na sitwasyong dinadaanan krisis ng Amerika. Sa totoo lang, humihina ang palitan ng US dollar (weak) sa currency ng mga bansa sa Europa (Euro) at Asia. Ang sigurado at walang kaduda-duda,nagsisimula ng bumuhos ang dolyar na ipinadadala ng mga OFW. Simpleng supply and demands, maraming dolyar, kakaunti ang nangangailangan.

Gumaganda rin ang stock market sa maraming bansa sa Asia (China, India at iba pa)! "Kaya't wag n'yo kaming gawing tanga, hindi lang ang bansang 'Pinas ang nakararanas ng paglakas ng local currency at stock market. Ang paghina ng dolyar ay resulta ng patuloy na paghina ng US economy, low interest rates at lumolobong US government deficit.

Kaya lang, kahit ipropaganda ng Malakanyang na malaki ang epekto nito sa binabayaran nating utang TRILLION piso, kahit sabihing magiging mura ang inaangkat (import) na produkto (finished products at langis), matinding dagok ang mararanasan ng ating mga iniluluwas (export). Ito ngayon ang problema ng bansang Hapon, South Korea, Singapore, Taiwan, New Zealand at Australia na kung saan humihina't nalulugi (tubo-profits) ang kani-kanilang mga exporters.

Habang nagdidiwang si Ate Glo at Malakanyang sa paglakas ng Piso, nagdadalamhati naman ang ating mga lokal na exporters (Cebu, sa Mindanao at mga industria sa Metro Manila) at ating mga kababayan may natatanggap na dolyar sa OFW, migrante sa Amerika at Europa. Ayon kay Ate Glo, "tumikas ng P49 ang Piso kontra Dolyar at malamang daw umabot hanggang P47 sa susunod na ilang buwan. Sa taong kasalukuyan, uunlad daw ng mahigit 5.3% ang ating Gross Domestic Product (GDP)."

Tumaas din daw ang per capita income ng mga Pinoy, mula $1,000 nung 1990, umabot na raw ito sa $1,400.oo. Sinong ordinaryong Pinoy ang tumaas ang income? Dahil dito, nakoryente na naman si Ate Glo ng sabihin nitong "nakahanay na raw ang Pilipinas sa Ikalawang Daigdig (2nd world), wala na tayo sa Ikatlong Daigdig?"

Na-upgrade din ang credit rating at sa susunod na taon, inaasahang magiging positibo ang rating ng 'Pinas sa pandaigdigan labanan sa UTANGAN. Tumaas ang gross international reserves ng bansa nuong Agosto, umabot na ito sa $21.54 B. Ayon sa Central Bank, "ito na raw ang pinakamataas na reserbang dolyar sa loob ng siyam na taon at kung magpapatuloy ang ganitong tendensiya, hindi mangingiming mamili na ito ng dolyar sa palengke."

Binanggit din ang umiiging larawan ng ating pananlapi (fiscal). Ang daming pondo na raw ang gubyerno na maaring gastusin sa pagawaing bayan (infra). Malaking tulong daw ang dalawang porsientong (2%) karagdagang buwis ng VAT nung unang quarto ng taon, maliban sa 10% naunan ng ipinataw nung nakaraang taon. Pinagyabang ni Finance Sec Gary Teves na P120.0 bilyon ang posibleng makulekta ng gubyerno sa taong kasalukuyan.

Malaki ang magiging pakinabang ng gubyerno sa mga pinagkakautang natin (IMF-WB) sa labas dahil liliit ng ilang bilyon dolyar ang mga bayarin (hal. mula sa dating $53.0 bilyon na utang, magiging $49.0 bilyon na lamang). Ayon sa Malakanyang, pinapatunayan lamang na "wasto't epektibo ang patakaran (economic fundamentals) at direksyong pang-ekonomiyang ipinatutupad nito."

Kaya lang, nagbabala mismo ang United Nation (UN) na 'wag na wag kaagad na maniniguro, maniniwalang gaganda (panloloko) ang ekonomiya ng mga bansa sa Asia, lalo na sa Pilipinas dahil lamang sa 'gumagandang ekonomiya' at paglakas ng stock market. Ayon sa kanila, habang sinasabing may pag-angat ng 6-9% growth rate ang mga bansa sa Asia, ganuon din kabilis, ganun din ang paglago, ang pagdami ang nawawalan ng trabaho (unemployment rate). (Ang average growth rate sa Asia ay naglalaro sa 6 hanggang 10%, ang pinakamataas na naitala sa buong mundo)

Ayon sa Economic and Social Commission for Asia and the Pacific (ESCAP), isang Bangkok-based UN agency, "ang pagbulwak, paglaki ng unemployment rate sa kabila ng sinasabing pag-unlad ng ekonomiya ay isang gabundok na suliraning kakaharapin ng rehiyon.

Kailangan tiyakin, siguruhin ng mga naggugubyerno at policymakers, na isang PRO-POOR nga, nagtritricle down effect, tumatagos hanggang baba ang paglago ng ekonomiya. Ayon sa kanila, isang bangungot at 'hindi dapat asahan ng mga mahihirap, (tulad ng mga retorika ng Moody’s Investor Service) ang mga DATOS ng paglakas ng Piso, stock market, GNP at lumalagong kalakalang import-export.'

Walang binatbat ang Moody’s rating sa gutom survey na inilabs ng SWS! Mas popular, kapani-paniwala ang huling survey na inilabas na mayroon ng tatlong (3.0 milyon) milyong pamilyang Pinoy ang nagugutom. Ipagpalagay na totoong may umasensong Pinoy, ito'y sa mahigit kumulang na limang libong (5,000+) pamilyang elitistang Pinoy, ang may kontrol at may tangan ng pampulitikang kapangyarihan ng bansa at patuloy na nangungurakot sa kabang yaman ng bansa.

Ang mga elite ang may hawak ng means of production, ugnayan at sabwatan sa mga dambuhalang dayuhang korporasyon at makapangyarihang gubyerno, ang may hawak ng otchenta porsiento (80%) ng kabang yaman ng bansa. Sila ang maliwanag na hahamig, makikinabang at aasenso sa paglago ng ekonomiya at paglakas ng Piso.

Eh ano ngayon kung lumalakas ang Piso, ang siguradong isasambot ng maraming ordinaryong Pinoy.

Kung totoo ang RETORIKA sa ekonomya, dapat ibaba agad ang presyo ng langis, ang bilihin, kuryente’t tubig, hanapan ng trabaho ang mahigit apat na libong (4,000) “super KATULONG-caregivers, OFW na lumalayas araw-araw sa bansa. Kung totoong gumaganda ang ekonomiya, gawin abot-kaya, de-kalidad ang edukasyon, pabahay at kalidad ng pamumuhay (quality of life) sa kabuuan. Kung totoong gumaganda ang ekonomya, hindi na tatanggapin, tatanggihan na ng mga 'Pinoy ang panunuhol ng mga pulitiko (vote buying-utang na loob) tuwing may halalan, ang karamihang botante ay magiging matalino sa pagboto't pagpili ng matitinong PULITIKO at 'di TRAPO.


Doy Cinco / IPD
Nov 4, 2006