Pilipinas, Kidnapping capital ng South East Asia

Masyado nang kahiya-hiya sa mundo ang sunud-sunod na banner headline ng Pilipinas sa isyu ng kidnapping ng isang pareng Italyano sa Mindanao. Valedictorian na nga ang gubyerno sa pangungurakot sa Asia, numero uno pa rin sa kidnapping at political killings. Sa mata ng mundo, lalabas na “wala na sa Malakanyang at kay Ate Glo ang control ng sitwasyon.” Idagdag pa ang patuloy na umiinit na isyong pulitikal (isyu sa Comelec at Trillanes), kung hindi agad mareresolba ang release ni Fr Bossi, marami ang naniniwala na malamang umabot sa maagang pagbagsak ng kasalukuyang nakaupo sa Malakanyang ang epekto ng gulo sa Mindanao.

Kamakailan lamang sumambulat sa mga pahayagan ang $10.0 milyong (P470.0 milyon) pabuyang ibinigay ng US State Department sa apat na informant ng Abu Sayyaf Group (ASG) bilang pangakong pabuya sa pagkakapatay sa puno ng ASG na si Janjalani at iba pa. Dahil sa kinang ng salaping dolyar at direktang panghihimasok sa bansa, lalo lamang titindi ang terorismo sa Mindanao.

Marami ang naniniwala na magpapatuloy ang “terrorismo” sa Mindanao. Dahil sa panggagatong, pagkunsinti (suhol) at pakikialam ng US State Department, aasahang lalaki, lalala at maiinstitutionalized na ang gulo sa Mindanao. Wala ring malinaw na estratehiya’t taktika ang AFP upang masawata ang lahat ng armadong grupo sa Mindanao (terorista, rebelde at private army) bagkus may perceptiong nai-link pa sila rito. Mas kapani-paniwalang sabihin na ang terorismo’t kidnapping isyu ang siya ngayong pangunahing “INDUSTRIYA” sa Mindanao, bilang dollar earner na kahalintulad ng OFW remittances at employment generation. Hindi tayo magtataka kung bakit "lumalakas ang Piso kontra sa Dolyar?"

Isang malaking negosyong raket ang “terorismo at kaguluhan” sa Mindanao. Tulad ng sinasabi ng marami, hinding-hindi susugpuin ng ilang tiwaling heneral sa military ang “terorismo't kaguluhan” sa Mindanao. Kailan pa nagging seryoso ang military sa pagsugpo ng sinasabing paulit-ulit na terorismo sa Mindanao, may apat na dekadang ganyan na ang Mindanao? Lumalakas ang paniwala ng mga tao na mismo ang ilang tiwaling mga General at sindikato sa Malakanyang ang pangunahing suspek sa pagbebenta-supplier ng malalakas na armas sa Mindanao. Kaya't ang kasunod na tanong, paano kung mawala na ang hanap buhay, ang sideline at ang kapritso? Ang kasabihang “ wag mong patayin ang GANSANG nangingitlog ng ginto,” ang siyang nananalaytay na cardinal rule ng mga tiwali sa military.

Marami ang naniniwala na hindi lamang sa apat na makapili (informants) mapupunta ang kabuuang apat na daan at pitong milyong pisong (P470.0 milyong)70/30 ang nagging hatian, 70% ang napunta sa AFP at 30% lamang ang napunta sa apat at ilang grupo ng ASG.

Doy Cinco / IPD
June 14, 2007